ଫଟୋ ଭିତରୁ ବୁଢାଲୋକ ଜଣ ଆସି ମତେ ଧରିପକାଇଲେ

                                       ମହାସମାଧି ପରେ ବାବାଙ୍କ ଶରୀରକୁ  ବୁଟୁୱାଡାକୁ ନିଆଗଲା ଏବଂ ଯେଉଁ ସ୍ଥାନଟି ମୂରଲୀଧରଙ୍କ ବିଗ୍ରହ ପାଇଁ ଉଦ୍ଦିଷ୍ଟ ଥିଲା, ବାବାଙ୍କ ଇଚ୍ଛାରେ ସେହି ସ୍ଥାନରେ ତାଙ୍କର ସମାଧି ଦିଆଗଲା । ଏବେ ସମାଧି ନିକଟରେ ବାବାଙ୍କର ଯେଉଁ ଶ୍ରୀ ବିଗ୍ରହ ରହିଛି,ତାହା ପ୍ରଥମେ ନ ଥିଲା । ସେଠାରେ ଏକ କଳାଧଳା ଫଟୋ ପୂଜା ପାଉଥିଲା । ସେହି ସମୟରେ ମାତ୍ରେ ନାମକ ଜଣେ ଭକ୍ତ ତାଙ୍କର ଅଢେଇବର୍ଷର ଶିଶୁ କନ୍ୟା ସହ ଶିରିଡି ବୁଲି ଆସିଥିଲେ । ବୁଟିୱାଡର ଆହୁରି କିଛି ଅଂଶର ସେତେବେଳେ ନିର୍ମାଣ ଚାଲିଥାଏ । ଛୋଟ ଝିଅଟି କିଛି ପିଲାଙ୍କ ସହ ମିଶିଗଲା ଏବଂ ୱାଡାର ପ୍ରଥମ ମହଲାରେ ଖେଳୁଥିଲା । ହଠାତ୍ ପିଲାଟି ଭାରସାମ୍ୟ ହରାଇଦେଲା ଏବଂ ତଳକୁ ଖସିପଡିଲା । ଏହାଦେଖି ଉପସ୍ଥିତ ଲୋକମାନେ ଦୌଡିଆସିଲେ । କିନ୍ତୁ ଝିଅଟି ଆରାମରେ  ତଳୁ ଉଠିପଡିଲା, ଯେମିତି କିଛି ହୋଇ ନାହିଁ । ତା’ର କେଉଁଠି କିଛି ଆଘାତ ଲାଗିଛି କି ପଚାରିବାରୁ ଝିଅଟି କହିଲା ‘ଫଟୋ ଭିତରୁ ସେହି ବୁଢାଲୋକ ଜଣକ ଆସି ମତେ ଧରିପକାଇଲେ ।’  ଅଢେଇବର୍ଷର ଶିଶୁକନ୍ୟାର ଏହି କଥାଟି କ’ଣ ମିଥ୍ୟା ହୋଇଥିବ ?